Dende o grao de Traballo Social da Universidade de Vigo manifestan a súa “preocupación” polas declaracións do alcalde de Ourense, Gonzalo Pérez Jácome, nas que cuestionou aos profesionais do traballo social. A Xunta de Titulación de Grao remitiu un comunicado á Alcaldía, no que expresan tamén o seu malestar pola vontade do rexedor de suprimir dúas das catro unidades de intervención social (UNIS) do Concello, “para a súa centralización en unicamente dúas”.
O comunicado, aprobado o pasado xoves pola propia Xunta de Titulación, recolle a lexislación vixente e lembra que se debe “garantir a proximidade do servizo ás persoas e familias, cunha intervención personalizada no seu entorno”. Por iso, tal e como subliña o texto, “toda medida encamiñada a reducir esta proximidade supón un retroceso”.
Este organismo -no que están representados o decanato, persoal administrativo, profesores, investigadores e alumnado- explica que os desafíos dos servizos sociais “teñen que ver coa falta de medios económicos e recursos humanos suficientes, e coa excesiva sobrecarga de traballo dos profesionais”. Ademais, remarcan que o grao -establecido en 1994- forma traballadores dunha “profesión indispensable para a sociedade”, que promove o camio social a través dos “dereitos humanos”.
“Consideramos necesario manter e ampliar a rede de Servizos Sociais do Concello, e amosamos a nosa consideración e apoio ao colectivo profesional”, manifestan dende a Xunta de Titulación, que suma o seu rexeitamento ao xa expresado por outras institucións. “Solicitamos ao señor alcalde e aos grupos políticos que se valore na súa xusta medida o importante labor que se desenvolve desde os servizos sociais”, resolve o comunicado.
