Obituario | Eduardo Ventura, a fin dunha saga

Eduardo era unha persoa comprometida coa sociedade, ao igual que a súa irmá Loisa, falecida hai uns anos. Ambos participaron activamente na Transición, unha desde AN-PG e outro desde as Juventudes Socialistas. Eduardo Raimúndez, como era normalmente coñecido, exerceu de fotógrafo e deseñador gráfico.

Foi un dos participantes na exposición de “22 novos fotógrafos ourensáns” que se celebrou en 1985 na Casa da Xuventude cando esta entidade era un motor da vida cultural da cidade. Un ano antes colgara as súas obras no Ateneo e deseñara tamén o decorado onde se desenvolvía a obra teatral “Pedro e o capitán”, de Mario Benedetti, do grupo Rúa Viva, interpretada por Manolo Vidal e Abelardo Pérez Gabriel.

De caste víñalle a Eduardo esta afección xa que o seu pai, de igual nome, delineante con varios arquitectos da cidade, foi responsable do deseño de varias escenografías teatrais para grupos da súa época e dos decorados do “Festival do Miño - Canción do Mundo Celta” tanto no Xardín do Posío como no Pavillón de Deportes.

Nos últimos anos, dedicoulle moitas horas á investigación sobre a súa diversa e esparexida familia. A seu avó, Benigno Raimúndez, famoso xastre galeguista e con fillos de tres mulleres, que desenvolveu a súa actividade entre os anos vinte e sesenta do século pasado.

Seu tío Alexandre Manuel Raimúndez Fernández, locutor da BBC e responsable dos seus programas galegos, entre 1947 e 1956 que viviu desde a guerra en Inglaterra onde morreu. Outras ramas familiares espalláronse por Madrid e Santander e Eduardo recuperara hai pouco contacto, se cadra consciente de ser o derradeiro dunha saga en Ourense.

Lembramos nesta triste ocasión, a súa participación na homenaxe que no 2022 se fixo no Liceo ao “Galician Programme” da BBC, no que xunto con Eduardo estivemos na mesa os que asinamos estas letras.

Os seus restos descansan no cemiterio do Reino, Piñor, terra da súa viúva Dolores a quen lle enviamos unha aperta, como a toda a súa familia.