A Academia Galega do Audiovisual deu a coñecer esta mañá as obras e artistas nomeados para edición número XIX dos Premios Mestre Mateo que cada ano revisan a produción audiovisual galega.
‘Cinephilia’, o programa semanal dedicado ao cinema, producido por Noveolas Producciones e Telemiño, e conducido por Simone Saibene é un dos catro finalistas entre os 25 programas candidatos.
Telemiño empezou emitindo o programa dende finais de setembro do ano 2019. Dende entón, Cinephila emitiuse todos os mércores ás 22h, sen ningunha interrupción, tampouco durante o confinamento, levando xa un total de 77 programas. Cada programa, ten unha duración de 25 minutos.
Simone Saibene tamén está nomeado a mellor comunicador de televisión xunto con Alba Mancebo, Roberto Vilar e Rodrigo Vázquez.
Simone Saibene mostrou a súa alegría en recibir a noticia da doble nominación: “Alégrome moitisimo, sobre todo porque non me esperaba de figurar entre os nominados deste ano e aínda máis competindo de forma modesta con programas e caras moi coñecidas da Televisión Pública. Agradezo os/as académicos/as pola confianza, e por suposto á Telemiño e ao equipo que comparte esta aventura conmigo dende setembro 2019”.
Os gañadores daranse a coñecer na tradicional Gala de entrega de premios que se celebrará no Teatro Colón da Coruña o vindeiro sábado 10 de abril, e será retransmitida pola Televisión de Galicia. Este ano a gala será dirixida polo ourensán Tito Asorey.
