O Plan de pastos prevé investir ata 9,5 millóns en Ourense

O conselleiro do Medio Rural, José González, supervisou os traballos silvopastorís levados a cabo no monte veciñal en man común dos Montes e Os Campos, sito en Montederramo. Alí destacou que esta actuación, enmarcada no Plan de pastos de Galicia, é clave na prevención de incendios forestais, á vez que fomenta a gandaría en extensivo de Galicia.

O titular de Medio Rural lembrou que o Plan de pastos prevé actuar nunha superficie de 2.250 hectáreas en toda Galicia, o que suporá un investimento de 9,5 millóns de euros.

No caso de Ourense, executáronse pastos en 15 concellos que supuxeron o acondicionamento de 355 hectáreas. Un destes pasteiros foi o de Montederramo, que supuxo o acondicionamento dunha superficie de 22 hectáreas do monte propiedade dos veciños de Pena de Outeiro e Santiago de Medorra. Nestas actuacións, investiuse un orzamento de case 142.000 euros e os traballos consistiron na implantación do pasteiro tras a roza e sementado, na colocación de peches perimetrais en 3.120 metros, a captación e condución de auga e a colocación dun bebedeiro para o gando vacún.