A UVigo entrega 3.600 euros nos premios de relato curto

O Campus de Ourense, no marco dos actos do Día das Letras Galegas, entregou onte os galardóns dos tradicionais Premios de Poesía, Relato Curto e Tradución 2021, convocados pola Área de Normalización Lingüística da UVigo co obxectivo de “distinguir o talento literario dos membros da comunidade universitaria”, segundo a organización.

Na modalidade de poesía, o primeiro premio foi para Branca Trigo polo poemario “Cyberfolk”. Ademais, concedéronse dous accésit, o primeiro para Noelia Estévez, por “A outra morte de Annabel Lee”, e o segundo para Mercedes Martínez por “Problemas de millennial”. En relato curto, o primeiro premio foi para Fabio Rivas, por “O Forxán e os asteroides”. O primeiro dos accésit nesta modalidade foi para Beatriz Comendador, por “A urdime”, e o segundo para Clara Costas, por “Un valse co teu recordo”. Por último, en tradución o primeiro premio recaeu en Joaquín García, pola tradución dun texto escrito en portugués por José Luis Peixoto e o primeiro accésit en Adrián Presas, por un texto escrito en catalán por Irene Solà.

EDICIÓN DAS OBRAS

O xurado desta edición dos Premios de Poesía, Relato Curto e Tradución da institución académica, dotados cun total de 3.600 euros e a edición das obras premiadas nun monográfico, estivo formado por Anxo Angueira, Jorge Luis Bueno e Liliana Valado (profesorado da Universidade de Vigo); Lourdes Lorenzo (directora do Departamento de Tradución e Lingüística da UVigo); Fernando Ramallo (director da Área de Normalización Lingüística da UVigo); Francisco Alonso (director de Edicións Xerais de Galicia); Luís López Alonso (poeta) e Manuel Lorenzo Baleirón (membro da Fundación Rosalía de Castro).