A presentación realizouse no marco dunhas xornadas sobre os retos, tendencias e oportunidades do sector
A Facultade de Ciencias Empresariais e Turismo do campus de Ourense acolleu unha xornada titulada Observatorio do Turismo Rural. Retos, tendencias e oportunidades para o sector, organizada polo Máster Universitario en Dirección e Planificación do Turismo Interior e de Saúde da Universidade de Vigo no marco dos actos de conmemoración do seu décimo aniversario. Durante a cita, o Observatorio do Turismo Rural, unha iniciativa de investigación conxunta desenvolvida por EscapadaRural.com, o CETT-UB e Netquest que xera coñecemento e achega información de valor sobre o sector do turismo rural en España, presentou os seus últimos datos referidos a Galicia. Madrileño, que vén de vacacións no verán, que reserva por correo electrónico... son algunhas das características dos clientes galegos deste sector.
Myriam Tejada, responsable de comunicación de EscapadaRural.com, e Enric López, director do Máster Universitario Dirección de Empresas Turísticas da Universidade de Barcelona, foron os encargados de presentar os resultados das enquisas feitas a propietarios e usuarios deste tipo de establecementos. “Desde o observatorio cremos que Galicia destaca por ser unha comunidade onde o turismo rural parece gozar de boa saúde e é moi ben percibido polo seu cliente. Trátase dun destino propicio para longas estancias, con capacidade de atracción sobre grandes mercados emisores e con moitas posibilidades de éxito na súa orientación ao cliente enogastronómico”, recolle o estudo.
