A importancia das abellas no mundo

As Nacións Unidas declararon o 20 de maio o Día Mundial da Abella. O obxectivo é principalmente concienciar á sociedade sobre a importancia no medio ambiente das abellas e a súa indispensable contribución tanto á agricultura como á alimentación e biodiversidade. Outro dos obxectivos desta celebración é denunciar as ameazas ás que se enfrontan as abellas na actualidade, entre elas o uso de pesticidas, os incendios ou a chegada de novos inimigos a causa da globalización, como é o caso do tártago asiático, más coñecido como Vespa velutina. Tamén é fundamental a sensibilización ante a necesidade de protexer ás abellas ante estas situacións adversas.

A Escola Galega de Apicultura e as súas entidades integrantes, Asociación Galega de Apicultura, Concello de Allariz e Fundación Ramón González Ferreiro, sumáronse á celebración organizando unha actividade dirixida ao público infantil. O entorno do Festival Internacional de Xardíns de Allariz acolleu esta proposta didáctica e lúdica na que participaron os escolares do CEIP de Xunqueira de Ambía e á que se sumaron as persoas que estaban a visitar os xardíns.

Os nenos participaron en diversos obradoiros que tiñan como finalidade que coñeceran ás abellas e aos polinizadores, que aprenderan a realizar a súa propia casa de insectos e que descubriran a variedade de meles que actualmente temos en Galicia.

Os organizadores da actividade animaron aos participantes na actividade a promover actividades divulgativas sobre as abellas no seu entorno, poñer plantas que máis lles gusten ás abellas nos seus balcóns e hortas, mercar mel e produtos apícolas locais, colocar "hoteis de abellas" onde poden vivir abellas solitarias e tamén outros insectos, evitar o uso de sustancias tóxicas para os insectos e polo tanto tamén para as abellas ou mercar alimentos que non as utilicen.

Os escolares amosáronse encantados coa proposta e como non podía ser doutra maneira, adicaron un bo momento á degustación de mel que lles deixou moi bo sabor de boca desta actividade fóra do centro.