A alianza Raia Seca, un modelo a seguir para América Latina

Unha delegación de representantes de área transfronteiriza da “tripla fronteira” (Arxentina, Brasil e Uruguai) visitou onte a Deputación para coñecer as boas prácticas da Agrupación Europea de Cooperación Territorial (AECT) Raia Seca Gerês-Xurés e implantalas nos seus territorios.

Luis Menor, presidente provincial, e Plácido Álvartez, vicepresidente terceiro, explicaron os pormenores da AECT, unha rede de cooperación entre concellos da Baixa Limia e do norte de Portugal. Menor puxo en valor esta agrupación, unha ferramenta “única, grazas á vontade entre Galicia e Portugal”, en dúas zonas de fronteira que “comparten especialmente lingua e cultura”.

No encontro, os representantes de América Latina amosaron os proxectos que están levando a cabo con países fronteirizos, así como o interese por coñecer o funcionamento en AECT Raia Seca en aspectos como a gobernanza, a cooperación entre municipios e as experiencias sobre o terreo na xestión dunha reserva natural.

Proxecto “trinacional”

A delegación latinoamericana estivo integrada por Maher Jaber, alcalde de Barra do Quaraí (Brasil) e coordinador da estrutura trinacional de cooperación transfronteiriza Comité de Trifrontera, con Monte Caseros (Arxentina) e Bella Unión (Uruguai).

Tamén participaron o uruguaio Daniel Bentancur, coordinador do Comité para el Desarrollo de la Cuenca del Río Uruguay, o arxentino Marcos Follonier, da Secretaría Técnica do Comité para el Desarrollo de la Cuenca del Río Uruguay, e Chema Cruz, coordinador da Iniciativa Global de la Asociación de Regiones Fronterizas Europeas (ARFE).