Os colexios soan a ritmo de música tradicional

O Museo da Gaita de Fole de Barbadás súmase á celebración das Letras Galegas achegando a música tradicional aos máis pequenos. As novas xeracións puideron descubrir a riqueza da cultura oral e a tradición popular galega a través da figura do músico e artesá, Pablo Martínez, que visitou nesta semana o CEIP Filomena Dato (Barbadás) e o CEIP As Mercedes (Ourense).

Unha iniciativa na que os participantes poden descubrir e experimentar cos instrumentos que foron utilizados historicamente como percusión popular. Co obxectivo de facer sentir o vínculo entre a vida e a cultura do pobo galego entre as novas xeracións, os centros educativos abriron as portas a unha actividade na que os máis pequenos aprenderon ritmos tocando os utensilios e cantando pezas tradicionais nun ambiente lúdico e educativo. Cun marcado enfoque inclusivo, interxeracional e que aposta polo valor da muller como transmisora da tradición oral e musical, o Museo da Gaita remarca a importancia de continuar promovendo accións divulgativas nunha liña que fomente “o orgullo pola nosa identidade”.