Protección Civil Barbadás estrea equipamento vial

O equipo de Protección Civil de Barbadás recibiu onte un novo kit de material loxístico de seguridade viaria que facilitará o seu traballo nas emerxencias na estrada. O concelleiro de Emerxencias, Daniel Rey, acompañado polo xefe de Protección Civil, David Corbal, e o voluntario do corpo David Barbosa, acudiron ao acto de entrega do material correspondente á Orde do 22 de xullo de 2024 da Consellería de Presidencia, Xustiza e Deportes da Xunta de Galicia.

Este tipo de axudas concédense en réxime de concorrencia competitiva, “o cal amosa o bo traballo desempeñado polos voluntarios de Protección Civil de Barbadás, que recibe material por décimo ano consecutivo”, sinalan dende o propio goberno local. Este novo kit permitirá realizar intervencións viarias con maior seguridade, non só para os voluntarios da agrupación, senón tamén para os propios condutores e peóns.

O acto de entrega dos equipamentos, realizado na Academia Galega de Seguridade Pública (Agasp) na localidade pontevedresa da Estrada, contou ca presenza do presidente da Xunta, Alfonso Rueda; o conselleiro de Presidencia, Xustiza e Deportes, Diego Calvo; o delegado territorial da Xunta en Ourense, Manuel Pardo e o director xeral de Emerxencias e Interior, Santiago Villanueva, así como alcaldes, concelleiros e voluntarios das agrupacións adxudicatarias.

O Concello de Barbadás pon en valor o relevante e incesante traballo de Protección Civil, e nesa liña seguirá apostando pola mellora de equipamento, instalacións e vehículos do servizo, tanto con medios propios como solicitando achegas da Xunta de Galicia e demais administracións.