Xosé Carlos Valcárcel, alcalde de Barbadás: “É necesario que a Xunta actualice o importe que destina aos concellos”

Superado o ecuador do seu terceiro mandato, o alcalde de Barbadás, Xosé Carlos Valcárcel fai balance destes dous anos e desvela os proxectos futuros do seu equipo de goberno.

Pregunta. Comecemos pola actualidade. O equipo de Goberno deu conta da falta de compromiso da Xunta co financiamento do Servizo de Axuda no Fogar. Como afecta isto as arcas do Concello?

Respuesta. O modelo da Xunta está esgotado. Agora mesmo, a Xunta é o Goberno central aportan uns 12 euros a un servizo que ten un custe de 34,23 euros hora. O Concello de Barbadás achega 436.000 euros a este servizo, case o 60% do custe total, cando non tiña que achegar un céntimo, xa que é de competencia autonómica. Nós non temos capacidade económica para manter esta situación, nin nós nin ningún concello de Galicia. O peor é que xa lle trasladamos esta problemática a Xunta, e lavouse as mans.

P. Falando de cuestións económicas. Os presupostos que veñen de aprobar non son entón suficientes para atender todas as necesidades?

R. As necesidades son sempre ilimitadas e os recursos limitados, polo que é imposible atendelas todas, pero si intentamos que os servizos que se prestan desde o Concello de Barbadás sigan mantendo a súa calidade, e incluso mellorala, e se é posible, crear novos servizos. Pero sí é certo que un Concello como o noso, que ten practicamente 800.000 euros de gasto en servizos que non nos son propios, que lle corresponde financiar a outras administracións, se tivese o financiamento correcto e acaido, podería destinar ese diñeiro a mellorar infraestruturas, dotacións, e esas necesidades, que como dicía antes, son ilimitadas, poderíanse atender mellor.

P. Outro dos temas candentes en Barbadás é o peche nocturno das pistas municipais polo aumento do vandalismo.

R. Esta medida chega para frear unha situación que nos preocupa. Non podemos permitir que infraestruturas deportivas novas, como é a do Paseo dos Amieiros, se convertan en elementos que perturben a convivencia veciñal, como está ocorrendo. A nosa veciñanza ten dereito ao descanso. O Concello non pode permitir que nunha instalación municipal esten berrando ata altas horas da madrugada e que aínda por riba se esnaquice o mobiliario. Isto non é un toque de queda, senón unha medida para que se cumpran as normas mínimas de convivencia veciñal.

P. A Policía Local do municipio leva tempo reclamando efectivos.

R. Nestes momentos contamos con seis efectivos, aos que sumará un máis o ano que ven. É certo que en moitas ocasións poden non ser suficientes, pero tamén é certo que a Policía Local ten atribuídas determinadas funcións e entre elas non está a seguridade cidadá. Polo tanto, eu apelo ao Goberno central a que dote de máis efectivos a Guarda Civil. É certo que nós temos una carencia, pero a necesidade básica está na Guardia Civil. Iso é o que habería que rectificar.

P. Mantén esperanzas en conseguir o Cuartel da Guardia Civil?

R. No caso do cuartel a situación é a seguinte. O tenente coronel, Rafael Berguillo, ofreceunos a posibilidade de que cederamos un terreo propiedade do Concello para a construción do cuartel. Ese terreo está localizado, pero houbo modificacións por parte do promotor. Agora, estamos pendentes de que a Xunta aprobe esas modificacións para retomar o proxecto.

P. Ven se asumir o cargo como deputado provincial. Vostede sempre foi dos máis críticos ca repartición de fondos da Deputación.

R. A Deputación é unha institución que ten que representar por igual a todos os veciños da provincia, pero segue habendo subvencións dixitais. Eu considero que se ten que ampliar a cantidade que vai destinada ao plan CooperOu, para que non haxa tantas carencias no financiamento.

P. Que hai en axenda para o futuro?

R. Temos que afrontar a ampliación do polideportivo municipal e queremos dotar a Barbadás dun polígono empresarial. Tamén seguir potenciando os obradoiros de emprego, neste sentido cabe destacar que só temos un 3,5% de paro, unha das taxas máis baixas da provincia. Creo que prestamos un gran servizo a nosa veciñanza, pero para poder seguir nesta liña, é necesario que a Xunta actualice dunha vez o importe que destina aos concellos, que leva 13 anos na mesma situación.