Actuacións para representar a violencia contra as mulleres en Carballiño

O sábado as rúas do Carballiño serán o escenario da actuación “Saír Correndo”, que poñerá o foco na violencia contra as mulleres, implicando ao público e combinando diversidade de xéneros como o teatro, a música ou a danza.

Preto de 50 persoas entre actores, técnicos, músicos e veciños participarán deste novidoso proxecto que chega pola colaboración do Grupo de Teatro de Allariz, que dirixe Ángeles Alvarez, e a Agrupación de Teatro Agromar, da parroquia carballiñesa de Sagra, uníndose a esta iniciativa o grupo de Teatro Dar Trela, e a Banda de Música de Boborás ademais de outros veciños.

Ángeles Álvarez, acompañada do concelleiro de Cultura, Diego Fernández, e a concelleira de Igualdade, Silvia Baranda, presentou esta iniciativa que definiu como “roteiros de teatro de rúa”, xa que o espectáculo comezará ás 18,30 horas no Templo do Veracruz, pasando por diversos espazos ata chegar á Praza Maior.

Ese percorrido polas rúas irá representando as diferentes fases que atravesa unha relación tóxica que remata en violencia contra a muller, e que se escenifica con textos teatrais, pezas musicais e movemento.

A actividade estaba incluída na programación do Día Internacional para a Eliminación da Violencia contra as Mulleres, pero tivo que adiarse polo mal tempo.