Avantar lanza un novo Roteiro Manuel María en O Carballiño

A Agrupación Cultural Avantar pechará a programación dedicada ao seu 50 aniversario cunha nova edición do Roteiro Manuel María, que terá lugar o domingo 12 de xaneiro, con saída ás 11,30 horas dende o anfiteatro da Praza da Veracruz.

Este será o punto de inicio dun percorrido pola vila do Arenteiro seguindo as placas que recollen a obra do Cantigueiro do Orcellón de Manuel María, no cal o poeta chairego reflicte o seu sólido e agaramiso vencello coa vila ó longo da súa vida.

Avantar deseña cada ano un roteiro dirixido aos alumnos dos centros escolares da vila, a fin de achegar a estudantes e profesores á obra literaria do escritor. Nesta ocasión, segundo explican dende o colectivo, o roteiro diríxese ao público adulto, e no mesmo a música e a lectura constituirán o eixo central da actividade.

O evento contará coa presenza de membros da Fundación-Casa Museo Manuel María así coma veciños do Carballiño que tiveron relación co autor e tiveron grande influenza na obra Cantigueiro do Orcellón.

Así, da man dun arrieiro, os participantes nesta actividade poderán percorrer os distintos fito-poemas que fan referencia ás localizacións recollidas na obra. O roteiro rematará na Fonte de Flores e, deseguido, realizarase unha interpretación musicalizada de poemas do escritor.