Banda da Loba presenta o seu quinto traballo “Lovismo”

Banda da Loba ofrecerá no Carballiño o próximo mes de febreiro o seu primeiro concerto na provincia de Ourense na xira de presentación do seu quinto traballo, “Lovismo”.

O concelleiro de Cultura, Diego Fernández subliñou que “a actuación coincidirá na víspera do Día de Rosalía de Castro, cun grupo de cinco mulleres que cantan en galego e defenden a cultura galega”. Andrea Porto, baixista do grupo, adiantou que “Lovismo” xira en torno a temática do amor “en todas as vertentes, das amigas, das parellas, das fillas e do amor a unha mesma, cunha visión dende o feminismo e a sororidade”.

No repertorio inclúese unha canción baseada nun poema de Rosalía de Castro “no que a poeta xa no século XIX abordaba cuestións como o pracer nas mulleres”. O concerto terá lugar no Auditorio o 22 de febreiro, ás 20,00 horas, e o prezo da entrada será de 10 euros.