Concurso de decoración de Nadal para bares e comercios

O Concello do Carballiño convoca o Concurso de Decoración de Nadal 2024, cuxas bases vén de publicar o Boletín Oficial da Provincia. Poderán participar todos os establecementos comerciais e hosteleiros da vila, sen distinción por razón da súa actividade ou titular.

O importe asignado no orzamento municipal a esta finalidade ascende a 900 euros, establecéndose tres premios para a mellor decoración nos comercios; sendo o primeiro de 200 euros, o segundo de 150 euros e un terceiro de 100 euros. Nos establecementos de hostalaría otorgaránse tres premios, tamén de 200 euros para o gañador, 150 para o segundo e 100 euros para o terceiro.

As inscricións deberán formalizarse por escrito na sede electrónica do Concello www.carballino.gal, ou ben de forma presencial no rexistro municipal ata ás 12,00 horas do 13 de decembro.

Asociacións veciñais

O Boletín Oficial da Provincia ven de publicar tamén a convocatoria das axudas a Asociacións de Veciños, que deberán estar legalmente constituídas e inscritas no Rexistro de asociacións da Xunta e do Concello, con domicilio social no municipio.

As entidades que soliciten a subvención poderán percibir ata un máximo de 1.000 euros para gastos de investimento e ata 600 euros para gastos correntes e de funcionamento. As asociacións deberán cubrir a correspondente solicitude mediante modelo normalizado que se facilitará na Área de Medio Rural do Concello do Carballiño, e presentala en rexistro antes do 19 de decembro.