A Cooperativa Santa Mariña de Loureiro celebra os seus 50 anos

A Cooperativa Santa Mariña de Loureiro, en O Irixo, dedicada ao envasado de leite e elaboración de derivados, celebra mañá o seu 50 aniversario, contando coa presenza de máis de 200 veciños e traballadores que asistirán a unha misa e posteriormente a un xantar. A primeira xunta provisional da cooperativa foi creada o 19 de setembro de 1966, sendo o impulsor e primeiro presidente da mesma Antonio Gonzalez Bernárdez (sacerdote na parroquia de Loureiro). Tres meses despois o Ministerio de Traballo aprobaba a inscrición da mesma no rexistro nacional.

No ano 1976 a cooperativa adquire a primeira pasteurizadora e obtén o título de Central Leiteira. En 1988 iníciase a produción da fábrica de queixos, máis tarde a de iogures e por último en 1999 consegue fabricar o primeiro kéfir galego.

En toda a súa traxectoria, a cooperativa recibiu diversos galardóns e recoñecementos. Actualmente segue innovando e ampliando o seu mercado, actuando como elemento dinamizador da parroquia.

A festa terá lugar este sábado no campo da festa da parroquia de Loureiro.