As escolas de danza e de teatro do Carballiño volven impartir clases en outubro

A Concellería de Cultura do Concello do Carballiño vén de informar que as escolas municipais de danza e teatro comenzarán o novo curso o vindeiro día 1 de outubro. O prazo para inscribirse comezou este xoves, e permanecerá dispoñible ata o remate de tódalas prazas dispoñibles, se ben tódalas aulas teñen un número máximo de alumnos. No caso de non acadarse un mínimo, a actividade poderá ser suspendida.

A escola de teatro municipal conta este novo curso con tres grupos, infantil (de 6 a 12 anos), iniciación e perfeccionamento (a partir dos 13 anos), con 15 prazas cada un deles.

Pola súa banda, a escola de danza ofrece un total de catro actividades distintas, con 20 prazas cada unha: zumba, ritmos latinos, pilates e funky, que ten dous grupos, un para nenos de 5 a 7 anos, e outro de 8 anos en adiante.

O impreso de inscrición está dispoñible no departamento de Cultura, no segundo andar do Concello, e con el cómpre recoller o recibo do importe da matrícula no servizo de Recadación. A inscrición ten un prezo único para teatro e para danza, 14,92 euros. As mensualidades son de 11,59 euros, agás para as clases de funky, que terán un coste de 21,60 euros ao mes.