Espazo Común pide beirarrúas de Partovia a Porto de Eguas en Carballiño

O grupo municipal Espazo Común do Carballiño defenderá no próximo pleno unha moción para que se constrúan as beirarrúas entre as localidades de Partovia e o Porto de Eguas. Afirman os concelleiros que é esta unha vella demanda dos veciños da zona que xa merece ser atendida dunha vez pois trátase dun área moi transitada na que o perigo para os peóns é patente.

“Estamos a falar dunha estrada de titularidade autonómica, a OU-208, que neste tramo é case toda unha recta polo que a velocidade dos vehículos, en moitos casos, é moi superior á aconsellable. Namentres os viandantes vense obrigados a circular polo mesmo firme ante a ausencia total de ningunha outra opción”, sinalan.

Por iso, este grupo da oposición considera que “é tempo de atender esta necesidade por parte das administracións implicadas”, e engade que “dende Espazo Común si que cremos no rural e en dar todo o apoio posible ás familias que deciden vivir nel. Non basta con cambiar unha farola de vez en cando e un bombardeo de fotos recalcando o obvio, cómpre buscar inversións, cómpre dar calidade de vida”.

O alcalde, Francisco Fumega, consciente desta necesidade, asegura que “estamos traballando coa Xunta porque esa estrada é autonómica. Hai tres anos que lle fixemos a solicitude e esperamos que se fagan”.