A Pepa Loba regresará de novo á feira de Flores no Carballiño

A Pepa Loba regresará de novo este setembro ao barrio de Flores para celebrar unha nova edición da súa feira e festa. O evento comezará o próximo venres ás 18:00 horas coa apertura do mercado de artesanía, seguido dun acto especial que este ano ensalza a figura dos retratistas, contando coa participación de Moncho Fuentes, Felipe Senén, e Miguel Anxo Fernández. A primeira xornada pecharase co tradicional conxuro da queimada.

Nesta edición, a programación incorpora varias sesións de cine ao longo dos tres días de feira, complementadas con demostracións de vellos oficios, obradoiros, música en directo e campionatos de xogos populares. Tamén haberá lecturas dos libros “Pepa Loba: realidade ou lenda” e “La juventud de Pepa Loba”.

O sábado, ás 20:00 horas, terá lugar a esperada baixada da bandoleira e a súa gabilla ata a feira de Flores, a cargo do grupo de teatro Dar Trela, quen tamén descubrirá unha placa conmemorativa en honra a Rosa Núñez, a artífice desta festa.

As actividades continuarán o domingo pola mañá, culminando cun xantar de confraternidade e o sorteo dunha figura da escultora Laura Rodríguez.