A realización de catas arqueolóxicas retrasará o proxecto de rehabilitación de O Mosteiro

O proxecto para a rehabilitación do conxunto histórico artístico emplazado na localidade carballiñesa do Mosteiro de Lobás, que está integrado por unha abadía do século XIII e unha igrexa románica, vaise retrasar ata o vindeiro outono. Deste xeito, non se cumpliu a previsión do equipo municipal de goberno do Carballiño de ter presentada en febreiro unha memoria das obras para a súa inclusión no convenio do 1% que Fomento destina a iste tipo de restauracións.

Ó respecto, o alcalde carballiñés, Carlos Montes, sinala que ’ó estar catalogado como BIC (Ben de Interese Cultural), a Dirección Xeral de Patrimonio apuntou que antes de comezar a redacción do proxecto hai que realizar prospeccións arqueolóxicas no entorno do Mosteiro’. Neste sentido, o rexedor comenta que ’os expertos sospeitan que baixo a igrexa hai unha cripta onde poden estar soterrados os abadesas e monxes do antigo mosteiro benedictino’.

Actualización

Carlos Montes engade que ’unha vez rematadas estas catas, os técnicos municipais coa colaboración dos adscritos a Patrimonio xa poderán redactar o proxecto e así poder presentalo antes de que se reúna a comisión de evaluación de Fomento, no mes de outubro’. O alcalde do Carballiño lembra que ’o Concello tiña feito un proxecto do ano 1995, pero haberá que actualizalo e axeitalo ós resultados arqueolóxicos’.

O obxectivo é levar a cabo a restauración da igrexa e converter o mosteiro ’nun edificio multicultural cun centro de interpretación do patrimonio, unha sala de proxeccións audiovisuais e un pequeno auditorio’, indica o rexedor. O Concello carballiñés contempla nos orzamentos deste ano unha partida de 800.000 euros para as obras, dos cales deberá aportar unha porcentaxe do 20%, é dicir, 160.000 euros.