Recital de María Galiana e Luis Santana sobre Pardo Bazán

A lembranza de Emilia Pardo Bazán volve ao Carballiño da man da actriz María Galiana e do barítono Luis Santana. A obra “Mi miquiño del alma” poderase ver no anfiteatro da Veracruz o próximo día 10, a partir das 21,00 horas.

Neste 2021 estase a celebrar o centenario do pasamento de Emilia Parzo Bazán e un dos aspectos nos que se está a incidir é na súa relación con Benito Pérez Galdós. Dos 32 anos nos que mantiveron a súa relación consérvanse 90 cartas e ese foi o material co que traballaron a actriz María Galiana e o barítono Luis Santana para crear o espectáculo.

A montaxe que este sábado chega a O Carballiño (o único espazo de Galicia onde se poderá ver xunto coa cidade de A Coruña) é un recital poético dedicado a Emilia Pardo Bazán ao redor das cartas de amor remitidas a Benito Pérez Galdós.

María Galiana é coñecida polo seu papel de Herminia, a avoa da serie de televisión “Cuéntame cómo pasó”. É licenciada en Filosofía e Letras e exerceu como profesora de Historia e Historia da Arte ate a súa xubilación no ano 2000. Galiana recibiu o Goya á mellor actriz de reparto na película “Solas”.

Luis Santana é un barítono zamorano, que comezou os seus estudos musicais aos cinco anos baixo a ensinanza de grandes mestres. Na actualidade faino co tenor español Pedro Lavirgen e con Teresa Berganza.