Segunda andaina para reivindicar o Camiño de Nós

O próximo sábado terá lugar a II Andaina Cultural Camiño de Nós (1926-2022). Trátase dunha das actividades programadas para reivindicar o tramo que fixeron cinco galeguistas da Xeración Nós desde Ourense a Compostela como unha variante da Vía da Prata e tamén para que sexa declarado este camiño polo Xacobeo como Itinerario Cultural.

A Deputación de Ourense impulsa esta iniciativa na que se involucran tamén os 10 concellos polos que pasaron Vicente Risco, Ramón Otero Pedrayo, Lois Feixoo, Antón Sánchez e Xavier Pardo no ano 1926, e tamén a Fundación Insua dos Poetas.

No 2020 xa se publicou un libro da crónica que escribiu Xavier Pardo sobre as experiencias que viviron no camiño.

A andaina comezará as 11,00 horas do 1 de outubro e este ano como novidade partirá da Praza dos Liborianos, no Carballiño, onde estaba ubicado o desaparecido Hotel Carlos, onde fixeron noite os camiñantes. Tamén se procederá ao develamento dunha placa alusiva a súa estancia no Carballiño.

A andaina continuará por Ponte Veiga, A Costiña, Barro, Pazo de Madarnás, Igrexa de Madarnás, A Esgueva, Ponte do Eixán e Insua dos Poetas, onde haberá unha degustación de produtos da comarca. Os interesados deberán inscribirse en oixcultura@carballino.gal.