Teatro, baile e unha charla contra a violencia de xénero

25N

O acto institucional terá lugar o venres 29 e contará coa participación dos centros educativos e asociacións da vila

O Concello do Carballiño conmemorará o Día Internacional para a Eliminación da Violencia contra as Mulleres con actividades que incluirán teatro, unha charla informativa, un taller de baile e o acto institucional.

A edil de Igualdade, Silvia Baranda, presentou onte a programación, xunto ás traballadoras do Centro de Información á Muller. Un cartel que inclúe como novidade a performance“Saír Correndo” na que os grupos de teatro Agromar de Sagra, Dar Trela e o grupo de pais e nais da Universidade Laboral de Ourense, realizarán unha representación polas rúas da vila, coa colaboración de veciños e músicos, cuxa data está pendiente de concretar. O mércores 27 de novembro no IES nº1 desenvolveráse a charla “Agresións e violencia sexual” a cargo de María Angélica Mercado Torres, especialista de estudios de xénero e política de Igualdade.

O acto institucional será o venres 29 de novembro ás 12,00 horas no salón de plenos do Concello, coa participación do alumnado dos centros educativos, Cruz Vermella, Bo Día Familia, Aspadisi, Asdifica e asociacións de mulleres, e incluirá á lectura dun manifesto.

No marco da programación inclúese un taller de baile terapéutico latino, afro e oriental os mércores pola tarde, no que as interesadas poden xa inscribirse no correo cim@carballino.gal.

Contenido patrocinado