As xornadas de cine do Carballiño serán un festival de curtas

Con motivo da súa 40ª edición, as Xociviga do Carballiño, que se celebrarán entre o 20 e o 24 de novembro de 2024, reinventaranse marcando un novo fito na súa historia ao transformarse nun Festival Internacional de Curtametraxes baixo o lema Ano Cero. Este cambio representa unha homenaxe ao pasado innovador das xornadas baixo un título que alude a un novo comezo, unha renovación necesaria nun panorama audiovisual en constante evolución.

Nos últimos anos, a pesares de contar xa cun concurso de curtas e diversas actividades paralelas, as Xociviga mantiñan parte da súa identidade orixinal como mostra de cinema, proxectando unha variada selección de filmes do ano correspondente. O Carballiño conta xa cunha gran proposta cultural dedicada á proxección seleccionada de longametraxes de calidade da tempada, o Cine Clube Carballiño, feito que resalta a necesidade de que as xornadas se actualicen para diferenciarse e converterse nun complemento cultural de valor na vila.

Ano cero

Este Ano Cero marca unha nova etapa, centrando a actividade no formato curtametraxe, que é de vital importancia para a industria e para un público con ánimo de descubrir e gozar do audiovisual contemporáneo. Así, as Xociviga asumen a súa responsabilidade como un piar para a difusión deste formato en Galicia.

Desta maneira haberá as seccións internacional unha ventá ao panorama actual da curtametraxe en todo o mundo, achegando ao Carballiño pezas de transcendencia global; Galicia dedicada a promoción do cinema galego; a de novos creadores dirixida a estudantes e cineastas emerxentes; unha sección infantil sobre o cinema pensado para os nenos; a de Carballiño, con cine realizado por xente deste municipio e a sección vídeos musicais en liña, para dar visibilidade a un formato audiovisual sempre en primeira liña de vangarda.

Como Festival Internacional de Curtametraxes, as seccións Internacional, Galicia, NovosCreadores e Videos Musicais en Liña serán competitivas, con premios outorgados por un xurado profesional, un xurado novo e o propio público. As seccións Carballiño e Infantil serán unha mostra non competitiva.

As Xociviga son dende a súa orixe en 1984 un compromiso co cine, con Galicia e co futuro sempre cambiante do audiovisual, sinalan os responsables da Concellería de Cultura do Concello do Carballiño.