Celanova convértese no epicentro do audiovisual

O Auditorio Municipal Ilduara de Celanova será o escenario da vixésimo segunda edición do Curso de Medios Audiovisuais (CeMAC), do 6 ao 10 de xullo. Baixo o título “Audiovisual galego. Diversidade creativa”, o encontro, presentado esta semana no Centro Cultural Marcos Valcárcel de Ourense, centrarase en analizar a consolidación e o equilibrio industrial e creativo do sector en Galicia.

O programa deste ano, que mantén o seu carácter de curso universitario, vai máis alá do formato académico tradicional. A organización aposta por enriquecer a experiencia do alumnado mediante a incorporación de actividades paralelas como exposicións, concertos, presentacións e obradoiros prácticos. Nas diferentes sesións, debaterase sobre os pasos cara á normalización do ecosistema audiovisual no país, analizando a diversidade dos seus soportes e formatos actuais.

Para afondar nestas cuestións, o CeMAC reunirá a profesionais de eidos como a dirección, o guión, a produción, a fotografía ou a música. A súa presenza permitirá radiografar a situación actual das industrias culturais e explorar novas posibilidades de actuación.

A iniciativa está promovida pola Fundación Carlos Casares, a Universidade de Vigo, o Concello de Celanova e a Deputación de Ourense, co financiamento da Xunta a través de Agadic.