O litixio xudicial contra Curros Enríquez chega aos escenarios

O Concello de Celanova, a Deputación de Ourense e a compañía de teatro Malasombra presentaron onte unha nova proposta escénica que, de forma desenfadada e atractiva para o espectador, reproduce os pormenores do proceso xudicial sufrido polo poeta Manuel Curros Enríquez a raíz da publicación do poemario “Aires da miña terra”, no ano 1880.

O centro cultural Marcos Valcárcel albergou onte a presentación deste novo proxecto teatral, con guión de Cándido Pazó e que representará a compañía Malasombra, contando coa presencia do alcalde celanovés e presidente da Fundación Curros Enríquez, Antonio Puga, máis o director da área de Cultura da Deputación, Marcos Vázquez.

Cofinanciada no marco da Rede de Auditorios provincial de Ourense, a obra “O proceso. Unha ollada cómica a un asunto serio. O proceso xudicial contra o poeta Curros Enríquez” estrearase este venres ás 20,00 horas no Auditorio Municipal Ilduara.

Despois do estreo, este venres en Celanova, a obra xirará polos teatros galegos.