Sés conquista Celanova cunha potente proposta

Cunha presenza escénica que brilla por si soa, Sés encheu o claustro do mosteiro de San Salvador coa súa música e os seus pensamentos, facendo vibrar a un público comprometido que desfrutou dende o primeiro minuto dunha noite de verán para o recordo.

Sés, durante a súa actuación en Celanova. | Miguel Ángel

Facer arte dentro da propia arte. Iso é o que fixo onte Sés no claustro de San Salvador en Celanova. A cantautora galega chegou a este recuncho máxico da provincia no marco da primeira edición do festival “Ou Yeah!”.

Subiu ao escenario coa intención de ofrecer aos asistentes unha noite inesquecible, e o certo é que non foi unha tarea demasiado complicada. A súa presenza escénica rapidamente contaxiou aos presentes, que desfrutaron dun percorrido pola longa traxectoria da artista. Sés foi fiel ao seu repertorio máis coñecido cun estilo característico: unha mestura de rock, folk galego, canción de autor latinoamericana e actitude punk. Con todo, foi “Tempestades de sal”, un dos seus temas máis recoñecibles, o que fixo vibrar máis alto ao público.

Firme cos seus principios, e como é habitual nos seus directos, Sés aproveitou o momento para por sobre a mesa letras comprometidas e mensaxes sociais. Ademais, mantivo un contacto directo co público, que sen dúbida viviu unha noite que quedará para o recordo.

A música continúa

O ciclo de concertos do “Ou Yeah!” continúa o o 6 de setembro en Xinzo de Limia. Na Alameda do Toural, actuarán La Guardia e Habitación Vudú —a banda local que lidera José Freiría—. Con todo, a última cita deste novo festival ourensán terá lugar o vindeiro 11 de outubro, no pavillón Paco Paz de Ourense. Alí os asistentes poderán desfrutar dunha sesión de clausura a cargo da banda Jethro Tull

Contenido patrocinado