Vilanova dos Infantes terá unha mobilidade máis respectuosa

A Deputación vén de iniciar a primeira fase das obras de humanización na estrada OU-0251 ao seu paso polo núcleo celanovés de Vilanova dos Infantes, co obxectivo de mellorar a seguridade viaria nunha contorna recoñecida como Ben de Interese Cultural. Esta actuación conta cun investimento de 130.000 euros e o seu prazo de execución estímase nun máximo de catro meses.

O proxecto busca incrementar a calidade de vida dos residentes mediante a redución da velocidade dos vehículos e a creación de espazos máis seguros para a convivencia entre tráfico e peóns. Para garantir a protección da riqueza histórica e arquitectónica deste núcleo singular, as obras seguirán unha coidada integración paisaxística.

En canto aos materiais, empregarase pedra de granito e lastros para os pavimentos e as beirarrúas, respectando así a identidade do núcleo histórico.

Soterramento

Ademais das melloras visibles na superficie, a intervención aproveitarase para modernizar as infraestruturas subterráneas, incluíndo a canalización soterrada das redes de pluviais, baixa tensión, iluminación pública e telecomunicacións.