60 parellas coñecen os encantos do Pazo de Toubes, en Cenlle

A primeira edición da xornada de portas abertas ”Si, quero no Pazo de Toubes” reuniu o pasado domingo a 60 parellas con planes de voda, nun evento organizado co fin de axudarlles a planificar o seu gran día nun entorno único.

Os asistentes descubriron os diferentes espazos do Pazo, rodeado de viñedos e séculos de historia, e realizaron visitas guiadas coa responsable de eventos. Tamén participaron profesionais do sector, que compartiron espazo e experiencias ofrecendo asesoramento próximo e personalizado. Fotografía, vídeo, moda nupcial, música, decoración, ilustración, tatuaxes… todos co obxectivo común de inspirar e axudar a dar forma á voda soñada.

A cita contou tamén con ofertas especiais, sorteos e degustacións gastronómicas, incluíndo un cóctel a cargo do restaurante Pazo de Toubes e unha selección de viños da bodega Viña Costeira, que permitiron achegarse ao estilo culinario que podería formar parte dun banquete dunha voda real.

Un dos momentos máis emotivos foi a simulación dunha voda ficticia, na que a parella selou o seu amor a través do ritual simbólico do viño. Un xesto cargado de significado, enraizado na identidade vitivinícola do Pazo.

As parellas, moitas das cales coñeceron por primeira vez o Pazo de Toubes, quedaron namoradas do seu encanto, e algunha xa ten visita prevista para concretar detalles e avanzar nos preparativos.