Arte e literatura despiden o ano na Casa dos Poetas en Celanova

A Fundación Curros Enríquez de Celanova recibe o Nadal con novas presentacións e actos culturais abertos a toda a cidadanía. O escritor e mestre en Celanova, Juanjo Lamas, achegarase mañá mércores a Casa dos Poetas da localidade para presentar a súa derradeira novela, un libro de relatos titulado “O meigallo dos soños” que viu a luz da man de Edicións Fervenzas

.O acto, fixado para ás 19:30 horas na sala da lareira, contará coa presencia do autor quen acaba de recibir o IX Premio Balbino de Relatos por este traballo.

O espazo acollía este pasado fin de semana dous eventos culturais. O venres inaugurouse a exposición “Aires reinterpretados” de Julio García. O pintor presentou unha colección de cadros inspirados na obra do autor de “Longa noite de pedra”, que se poderá visitar ata o día 21 de decembro de martes a venres de 10:00 a 14:00 e de 16:00 a 18:00 horas (sábados dende ás 11:00 horas).

O día 30 pola maña, Pilar García Negro desprazouse ata a casa familiar de Curros Enríquez para falar sobre Rosalía de Castro con motivo da publicación do libro “O clamor da rebeldía”.