Mari Luz González: “O meco é algo único, que nos caracteriza e que nos dá identidade como pobo”

O meco volverá a percorrer este ano os vellos camiños e pistas das aldeas de Xinzo e As Teixugueiras, no concello de Cartelle. Dous veciñas, Marisol e Mari Luz González, son as encargadas de ultimar os preparativos duns festexos que se desenvolverán de domingo a martes nun dos festexos máis anárquicos e ancestrais da provincia..

Como se presenta o Entroido?

Con moitas gañas despois do que levamos pasado. A xente está coa ilusión de saír e consideramos que os datos están mellorando, cada vez hai menos restricións e vamos a intentar organizarlo adaptados as circunstancias actuais. O outro día, falando cun veciño dos máis vellos, dicíame: “Sempre para adiante”, e niso estamos.

Que define ao Entroido das Teixugueiras?

A característica deste Entroido é que non o hai en ningún outro sitio. A figura do meco: saír ao monte o luns, a corrida do martes… Non hai ningún outro sitio de Galicia que o faga. É o que nos caracteriza e o que nos dá identidade como pobo e que temos que conservar. Logo, dentro da anarquía, temos unha orde. Quizais non sabemos a que hora imos saír ou onde está o meco o luns pola noite, pero á hora da corrida, o meco non se sae do camiño de Outeiro.

Para os veciños serán datas especiais

Uf, eu levo dende os 16 anos saíndo. Isto é a identidade do pobo. Tamén temos aos peliqueiros, que fai anos eu mesma empecei a recuperar, pero iso o teñen noutros sitios. O meco é algo único e que se mantén grazas a que houbo moita xente antes que nós que, ano tras ano, mantivo viva esta tradición. E iso é o que lle temos que transmitir aos mozos para que non se perda. Ademáis é unha festa para todos, onde saen dende nenos de dez anos ata avós con 90. Todos compartimos a festa!.

Cal é a programación deste ano?

Este ano trataremos de manter a programación doutros anos, aínda que polas actuais circunstancias non lle imos dar moita publicidade. Haberá gaiteiros o domingo e o luns sairemos a facer o meco e despois os veciños compartiremos unha cea nunha carpa. O martes será a corrida do meco ao aire libre, mantendo as distancias e as medidas fixadas pola pandemia. Tamén teremos pola tardiña a lectura do testamento do meco onde, en clave de humor, narraremos o que pasou no pobo no último ano.