Rebulir encheu Ramirás de música, baile e diversidade

Centos de persoas encheron onte o polideportivo do Picouto, en Ramirás, na gala central do Festival Internacional Rebulir (FIR). A música e o baile do país compartiron escenario coas danzas e melodías propias doutras latitudes, de Asturias e Valencia, pero tamén de Portugal, Timor Leste e México. Intercambio cultural e diversidade foron o denominador común dun evento que visibilizou que o rural está vivo e ten a mellor receita para a preservación da cultura galega: a súa xente.

Co aforo cheo dende fai días e máis de 200 persoas en lista de garda, o polideportivo vibrou e desfrutou coas actuacións das agrupacións Escontra’l Raigañu, Danses i Cançons Castalla, Jogo Pau de Moita, Academia Timorenses, Leyendas de México e Marichis Vigo, máis os anfitrións de Rebulir. Unha gala presentada por Lupe Blanco e Josinho da Teixeira no transcurso da cal se fixeron entrega os premios Rebulir Cultura Galega 2024 ao grupo Treixadura, á actriz Isabel Risco e á Asociación de gaiteiros e gaiteras galegas, ademais dunha mención especial á Emigración galega en Cataluña pola súa contribución a manter a cultura do país lonxe da terra. Galardóns que recolleron da man do presidente do Parlamento de Galicia, Miguel Ángel Santalices; o conselleiro de Emprego, Comercio e Emigración da Xunta, José González; a presidenta do Consello da Cultura Galega, Rosario Álvarez, e o delegado territorial da Xunta, Manuel Pardo.

Fai anos que o FIR consolidouse como unha cita ineludible no calendario cultural galego. Un evento que vai máis alá da propia gala, que dende o xoves ata hoxe domingo, congregou media ducia de actividades para nenos e maiores, palestras, exposicións e pasarrúas que se desenvolveron en diferentes localizacións de Ramirás, Celanova e Ramirás nunha edición adicada á muller rural e o seu papel fundamental como piares da sociedade rural galega. A edición de 2024, a máis longa e con maior participantes destes anos, rematará hoxe a partir de mediodía coa animación pola feira de Vilavidal dos integrantes dos grupos Escontra’l Raigañu de Asturias e os portugueses da Asociación Escola Jogo Pau de Moita.