700.000 euros para mellorar o saneamento e modernizar a depuradora de Verín

O Concello de Verín recibu unha subvención de 663.994,76 euros concedida pola Consellería de Presidencia, Xustiza e Deportes, no marco do fondo adicional ao Fondo de Cooperación Local.

O grupo de goberno destinará esta achega a financiar o 50% do proxecto de mellora da liña de auga e da eficiencia enerxética da Estación Depuradora de Augas Residuais (EDAR) verinesa, cun investimento total de 1.327.989,52 euros.

Segundo o alcalde, Gerardo Seoane, este proxecto dá resposta a necesidades críticas detectadas no sistema de saneamento e depuración de augas residuais. Actualmente a EDAR opera por riba da súa capacidade, tratando 540 m3/h, cando o seu límite óptimo é de 340 m3/h.

Ademais, as infiltracións na rede de saneamento dilúen as augas residuais, dificultando o proceso de depuración. A mellora proposta permitirá aumentar a capacidade de tratamento ata os 600 m3/h, garantindo un funcionamento eficiente e sostible.

Aforro económico e medioambiental

Máis alá da modernización da infraestrutura tras 30 anos en funcionamento, o investimento suporá un aforro anual de 150.000 euros para o Concello, pois o custo por verquidos reducirase ao pasar de 200.000 a 50.000 euros.

Fontes municipais aseguran que o proxecto tamén beneficiará a sectores clave da economía da comarca, como as embotelladoras de auga mineral e as adegas da DO Monterrei, alén de protexer a biodiversidade do río Támega e reforzar o compromiso cos Obxectivos de Desenvolvemento Sostible.