A comarca de Monterrei acolle un proxecto terapéutico para os máis cativos

O Centro de Información á Muller (CIM) da Mancomunidade de Municipios da comarca de Monterrei traballa na preparación do seu “Proxecto Respira II”, un programa de intervención terapéutica pensado para os nenos e nenas da comarca que están pasando por situacións complexas.

“Comezamos a organizar un dos nosos proxectos favoritos”, sinalan dende o CIM, que ofrecen a través desta iniciativa diversas actividades para que os máis cativos poidan desfrutar dun programa moi variado e completo. Entre as alternativas atópase un curso de hípica e coidado dos cabalos en familia, ademais de tratamento asistido con cabalos. Tamén se prevé realizar saídas á natureza, ioga ou mindfulness xunto con prácticas deportivas, concienciación de hábitos para a saúde e unha educación baseada na igualdade, axudando a impulsar a saúde e o benestar dos participantes.

Dende o Centro de Información á Muller informan de que “entregaremos unha bolsa a unha familia de cada un dos sete concellos que forman parte da Mancomunidade de Municipios” -Monterrei, Verín, Cualedro, Oímbra, Castrelo do Val, Laza e Vilardevós-, ofertando un total de 24 prazas, destinadas 10 deses postos para os adultos e as 14 restantes para nenos e nenas.

“Proxecto Respira II” desenvolverase entre os meses de agosto e setembro e serán o CIM, os servizos sociais e o Servizo de Atención Temperá (SAT) os que decidirán que familias participarán na iniciativa para este ano 2021.

Ademais, este conxunto de actividades, que veñen de dar a coñecer dende a Mancomunidade de Monterrei, está subvencionado pola Secretaría Xeral de Igualdade da Consellería de Emprego e Igualdade da Xunta de Galicia.