O Concello de Verín desbloquea orzamento para varias obras nun pleno extraordinario

O salón de plenos de Verín foi escenario o luns á tarde dun pleno extraordinario. En primeiro lugar, aprobouse por unanimidade a solicitude da modificación das características da concesión do aproveitamento de augas superficiais do río Támega, necesaria para poder incorporar no abastacemento ao pobo de Vilamaior.

A continuación, votáronse dúas modificacións de créditos. A primeira saiu aprobada cos 6 votos a favor do PSdeG e os 5 do BNG, e 4 abstencións do PP, e correspondía aos gastos de renovación da frota de vehículos do Servizo de Parques e Xardíns, un total de 30.000 euros.

A segunda tratábase dunha variación orzamentaria para cubrir gastos urxentes que non é posible adiar ata o próximo curso fiscal, e saiu adiante cos 11 votos favorables dos membros do grupo de goberno, por 4 votos en contra do PP.

Este reaxuste fiscal desbloquea para o Concello verinés un importe total no orzamento de 932.249,10 euros, e que permitirá, entre outras obras, o asfaltado do acceso ao polígono de Pazos, a construcción dunha pasarela sobre o Támega, ou o asafaltado da estrada de Vences.

Finalmente, á conclusión da sesión, celebrouse outra extraordinaria para sortear os membros das mesas electorais para as eleccións europeas.