Cualedro, Monterrei e Oímbra, unidos pola empregabilidade

O delegado territorial da Xunta, Manuel Pardo, participou este luns na casa da cultura de Albarellos xunto aos alcaldes de Cualedro, Monterrei e Oímbra na inauguración do obradoiro dual de emprego "Búbal IV", promovido de novo polo Concello de Monterrei.

A Consellería de Emprego, Comercio e Emigración inviste 420.928 euros na formación, durante nove meses, de 20 alumnos-traballadores en actividades auxiliares de acabados ríxidos e urbanización, actividades auxiliares en viveiros, xardíns e centros de xardinería e atención sociosanitaria a domicilio.

Pardo explicou que estes programas de emprego e formación teñen por finalidade ocupar a persoas desempregadas mediante a realización de obras ou prestación de servizos de interese xeral e social.

Actuacións nos concellos

Entre as actuacións que se levarán a cabo, en Cualedro terá lugar a humanización do entorno da fonte de Lamas e a consolidación de estruturas do Castro de San Millao; en Oímbra instalarase unha pérgola en Espiño e construirase unha beirarrúa no Terrón; e en Monterrei ampliarase o centro de interpretación do viño de Vilaza e o peche perimetral da zona cuberta na área recreativa de Vences.