O mel da comarca de Monterrei, premiado como un dos mellores de Galicia

A Asociación Galega da Apicultura (AGA) fai entrega anualmente dos galardóns aos mellores meles de Galicia en distintas categorías, e na edición de 2024 premiou o produto de Abella Obreira, producido en Riós, e de Aialma, elaborado en Souteliño, Laza.

Así, na categoría “Mel de Bosque”, Abella Obreira, de David Souto Gago, acadou o primeiro posto, mentres que Aialma, de José Antonio Pazos, foi o segundo clasificado. Ámbolos dous produtores son habituais, ano tras anos, dos galardóns que entrega a AGA, así como noutros certames nacionais e internacionais.

Non obstante, Aialma tamén acadou galardóns a nivel galego noutras dúas categorías, ao ser recoñecido como o terceiro mellor “Mel de Castiñeiro”, e obter o primeiro posto na categoría de “Deseño e etiquetaxe”.

Para David Souto, que leva con Abella Obreira dende 2012, estes recoñecementos reflicten “a calidade do mel que temos na comarca”, e asegura que no seu caso “este pasado ano producimos un produto que sabía como o de antiguamente”. En todo caso, na súa opinión o mel de Monterrei “valórase máis fóra que aquí”.

Pola súa banda, José Antonio Pazos, cofundador de Aialma con Lucía Parente, coincide en definir o mel da comarca como “impresionante”, e agradece os premios “aos nosos meles e ao noso deseño. Facemos sempre un manexo respectuoso coas nosas queridas abelliñas, e iso nótase”, conclúe.