O musical do Chivite de Verín chega ao Auditorio de Ourense

“Mil estrelas, musical de musicais” é o oitavo musical do Instituto de Educación Secundaria e Bacharelato (IES) Xesús Taboada Chivite de Verín, e o primeiro con guion orixinal, e combina catorce números doutros doce grandes musicais.

Durante a actuación, de 11,00 a 13,00 horas, está prevista a presenza de máis de 900 alumnos de distintos centros de Secundaria e Bacharelato de toda a provincia que, xunto con 58 profesores acompañantes, desfrutarán das dúas horas do musical do Chivite, que desprazará a Ourense a máis de 60 persoas, entre docentes e alumnos intérpretes.

Alén de ser unha actividade de normalización lingüística, o espectáculo estará signado en Lingua de Signos Española (LSE) polas dúas intérpretes do centro verinés, e que diariamente acompañan a unha das alumnas do Chivite, que tamén participa no musical.

Por este motivo, ademais dos estudantes e das distintas autoridades da Xunta e dos equipos de dinamización e normalización da lingua galega que fixeron posible esta actuación, tamén acudirá ao Auditorio público da comunidade xordomuda ourensá.