"A ocupación en Lobarzán é anterior ao tercer milenio antes de Cristo"

Lucía Rodríguez vén de presentar o seu proxecto fin de máster Estudo dos materiais prehistóricos de A Ceada das Chas/Castelo de Lobarzán: Unha aproximación dende o conxunto cerámico e os seus patróns decorativos. Un traballo de investigación que conclúe que os primeiros asentamentos no conxunto de Oímbra e Monterrei datan de antes do terceiro milenio antes de de Cristo. Lucía formou parte do equipo que, en 2019, iniciou un proxecto de recuperación patrimonial e ambiental destes xacementos arqueolóxicos ao longo de 18 hectáreas.

O proxecto iniciado o pasado ano xa está concluído, ¿en que apartado traballou vostede?

No traballo en campo. En xeral levouse a cabo unha prospección, na que participei xunto a Bea Comendador e na que levamos a cabo toda a recollida do material que eu estudei para o meu Traballo Fin de Máster e que ten que ver coa ocupación prehistórica do lugar. O resto do equipo traballou na intervención arqueolóxica con catas e na liña da ocupación medieval, que é posterior. Na ceadá e no outeiro do castelo se fixeron máis catas para indagar outro tipo de ocupacións. Falábase de que nesa zona había un castro e, en principio, non hai evidencia. É unha ocupación tardo-romana e logo plenamente medieval.

En que consistiu o seu traballo?

Como membro técnico na prospección e na recollida e inventariado de materiais. Os recollidos na prospección arqueolóxica e na excavación precisan unha xestión íntegra, que foi precisamente do que me encarguei.

Que tipo de materiais se recuperaron?

Sobre todo, material cerámico e lítico -pedras-. Na prospección atopamos puntas de flecha, que se asocian a unha ocupación prehistórica e machados pulidos de pedra. Na excavación atoparonse moedas. É unha zona moi afectada polos lumes e o material sofre moito, que se conserve a día de hoxe despois desto e toda a erosión é unha boa sinal. Non hai evidencia, por outra banda, da ocupación na Idade do Ferro, polo que a nomenclatura cambiouse ao non ter constancia da existencia do castro -cambiouse castro, por ceada-. En definitiva, os achados datan a ocupación dende a Prehistoria ata Idade Media.

Un novo estudo, mais en profundidade, pode arroxar novos datos nese senso ou dar a posibilidade de atopar un castro?

É un proxecto en activo e se levarán a cabo máis estudos de investigacións. O primeiro ano de traballo é fundamental para seguir nun desenvolvemento óptimo das actuacións. Hai un parapeto que foi considerado dun poboado calcolítico, sen embargo, sabemos con esta primeira campaña que non é así porque atopamos material dentro e fora e non ten sentido se fose unha muralla. O lóxico sería, no seguinte ano de traballo, facer unha intervención neste lugar.

Por que se decidiu a facer o seu TFM sobre esta cuestión?

A miña especialidade é a Prehistoria e, ao ver todos eses materiais, decidín facer un estudo máis pormenorizado e acadar mais información sobre o xacemento a través da cultura material.

Cal foi a conclusión final?

Hai unha primeira ocupación no xacemento anterior ao terceiro milenio antes de Cristo pola recuperación de cerámica cardial. Hai moi pouca cerámica deste estilo en Galicia.