Pappaquino, música electrónica galega de Verín para o mundo

Nada máis subirse ao escenario este pasado agosto no Extruga na Rúa, o festival de música e cultura urbana de Verín, Nuno Pico, o cantante e líder da banda galega Grande Amore, non podía deixar de felicitar ao artista que o precedera, un tal “Pappaquino”. “Non vai ser doado estar á súa altura, polo que pido un aplauso para el”, chegou a afirmar o cantante de Valadouro.

O que seguramente a meirande parte dos alí presentes descoñecía é que esa mesma noite fora o bautismo musical dese xove de apenas 26 anos da parroquia verinesa de Ábedes. Arroupado pola súa familia e amigos, Joaquín Limia, “Xocas” ou “Quino” de toda a vida, soubo sobrepoñerse aos nervios iniciais para acabar abraiando ao público, que desfrutou cun concerto que non será o último para un cantante que apenas leva uns meses producindo a súa propia música.

Formado como técnico de son, Limia leva toda a vida cun instrumento na man. O saxo, que estudou no conservatorio, é a súa debilidade, algo que se nota nas súas bases electrónicas, onde nunca falta. El encárgase de absolutamente todo: “Compoño, escribo as letras, fago e produzo as bases no ordenador. E todo con medios moi limitados, pero cun resultado que pasa por profesional”. Por se fora pouco, tamén se defende coa guitarra e o piano.

Tras sufrir unha pequena crise vital, na que “sentía que debía saír de Verín”, Limia fixo as maletas e acabou ao outro lado do Atlántico, en Canadá. Ano e medio despois regresou á casa da súa avoa en Ábedes, onde improvisou un pequeno estudo de produción e gravación co que dende marzo xa leva compostas varias cancións que escoitan milleiros de persoas de todo o mundo en plataformas coma Spotify.

Cando se lle pide que defina a súa música, Limia resúmea como “electrónica galega, independente e alternativa”. Nos seus temas mestúranse o R&B, o jazz, a fusión, o ska, o techno e rock. As letras tamén son froito de combinar o galego co inglés e o castelán.

A próxima parada son “uns bolos en Madrid, Valencia e Galicia de aquí a fin de ano, e algunha colaboración”. No horizonte, seguir compoñendo cancións ata poder publicar un álbum antes do próximo marzo, coincidindo cun ano dende que Joaquín, “Quino”, se convertiu en Pappaquino.