Riós acollerá un taller sobre igualdade e diversidade

“Cree, crea, crece” arranca este luns en Riós. Organizado polo Centro de Información á Muller (Cim) de Conso-Frieiras, é un taller de igualdade construído e pensado para evitar a violencia de xénero e fomentar a igualdade e a diversidade entre homes e mulleres.

“Neste taller crearemos un espazo no que cada unha das persoas participantes poida escribir a súa propia narrativa, onde se reflexione sobre o que foi, quen é e quen quere ser”, explican dende o Cim. Para iso empregaran materiais como a arxila, a cerámica e a pintura, a través dos que traballarán a narrativa da construción de xénero, as desigualdades e as esperanzas que cada unha das mulleres levan dentro.

O taller, destinado tanto a mulleres como homes do concello de Riós, celebrarase dende xaneiro ata xuño, con dúas sesións ao mes de dúas horas. O luns comeza o curso na Reitoral da Chaira -de 16,00 a 18,00 horas- e no centro multiusos de Riós -de 18,30 a 20,30 horas-. O día 13 realizarase a primeira sesión do taller no centro social de Castrelo de Cima -de 16,00 a 18,00 horas- e no centro social de Progo -de 18,30 a 20,30 horas-.

Dende o Cim de Conso-Frieiras recordan que para participar en “Cree, crea, crece” é necesario inscribirse neste programa de igualdade, a través dos números de teléfono 988 594 487 ou 988 425 032.