As Tanxugueiras actuarán en Riós polo XI Festival Latexos do Rural

Riós acollerá este fin de semana o XI Festival Latexos do Rural, evento que este ano trae ao municipio ourensá ás Tanxugueiras. As artistas galegas apadriñarán mañá un castiñeiro centenario e ás 18,00 horas darán un concerto en acústico dentro da xira Midas.

Máis alá disto, Latexos do Rural, un festival organizado polo actor Rubén Riós co apoio da Xunta de Galicia, Deputación de Ourense e Concello de Riós, encherá durante hoxe e mañá a localidade de variada actividade cultural. A cita comeza esta tarde coa presentación do libro “Arrieiros Somos”, seguida dun recital xeracional e da proxección da serie “A voz das nosas”. Durante esta xornada tamén haberá unha conferencia sobre o talento da lectura galega nas novas xeracións e unha cita co teatro da man de Kotodama Teatro. Os máis pequenos desfrutarán dunha sesión de contacontos na Biblioteca Municipal.

A xornada do sábado comeza co acto das Tanxugueiras presentado por Esther Estévez, culminando con unha “sesión vermú” coa banda de gaitas e pandereteiras do Riós e as pandereteiras “As travesas” da Mezquita. Xa pola tarde será o momento máis esperado, o concerto das Tanxugueiras, que comezará tras o turno de Arcadio Falcón and The bandits. Será a discomóbil A Gramola a que porá o punto final a esta edición do festival en Riós.