"Os tempos mortos do Führer" viaxa ao FIC Vía XIV de Verín

A sexta edición do FIC Vía XIV de Verín acollerá a proxección da webserie "Os tempos mortos do Führer", un proxecto nado en Ourense e rodado en lingua galega, cuxo prelanzamento foi filmado no Retiro do Conce, en Vilaza (Monterrei).

A webserie pretende ofrecer respostas ao espectador, en clave de ficción, sobre todo aquilo que ocupaba ao ditador Adolf Hitler nos seus ratos libres máis íntimos.

Ao longo de dez capítulos de cinco minutos cada un, "Os tempos mortos do Führer" amosa a cara oculta do seu día a día, afondando nos seus enredos, problemas, risas e sentimentos cun tono de comedia e satírico.

Dende a proudutora do proxecto, Conxuro Producións, considérase que o visionado desta webserie no Festival Internacional de Curtas representa unha "ocasión idónea para dar visibilidade ao proxecto" dirixido por Daniel Rodríguez González e con guion a cargo de Diego Temes Garrido.

A webserie conta, ademais, coa presenza da xornalista verinensa Esther Estévez, ben coñecida polo público por ser a presentadora do "Dígocho eu".