De Verín a Nepal en moto e con finalidade solidaria

Con motivo desta viaxe de máis de 17.000 kilómetros ao longo dunhas seis semanas, Conde organizou en Verín o pasado maio unha gala benéfica na que se recadaron 2.000 euros que xa foron entregados integramente á ONG “Abrazando Nepal”.

Un grupo de familiares e coñecidos non se quixeron perder o momento, e arrouparon a este arquitecto técnico no inicio do seu percorrido. Alén disto, un grupo de cinco amigos motoristas saíron con el e acompañárono ata Puebla de Sanabria.

Este luns está previsto que Conde se una en Barcelona a Raúl Sanz, experto profesional en viaxes en moto polo mundo, e máis un grupo liderado por el e conformado por 15 persoas e 13 motocicletas.

A chegada ao Nepal está prevista a primeiros do mes de novembro, e Óscar Conde conta con volver a Verín “o 11 de novembro, directamente en avión, a motocicleta volverá nun contenedor dous meses máis tarde”.

Conde, que se amosa “agradecido” coa empresa na que traballa por permitirlle cumprir “un soño”, afronta o seu maior desafío, despois de chegar a estar a máis de 6.000 metros sobre dúas rodas, “cruzamos todos os Himalaias en moto”. Tamén ten pensado “botar unha man na ONG e estar alí varios días”.