Os amantes da cervexa artesá cítanse en Moreiras

Se ben é certo que a cervexa non é un dos produtos máis típicos de Ourense, en Toén queren facerlle unha homenaxe a esta popular bebida. A asociación cultural Sabuleiros e o Concello de Toén coorganizan, o sábado 3 de xullo, a primeira Feira da Cervexa Artesá, un punto de encontro en Moreiras que servirá “para dar a coñecer aos produtores e tamén a diferentes artesáns do municipio”, segundo explica un dos coorganizadores, Antón Gil.

Gil leva anos facendo cervexa artesá en Toén e explica que “fun a moitas feiras por aí e pensei, por que non facela na casa?”. Así, comezou o xermolo desta feira que vivirá este ano a súa primeira edición. Nestes inicios, no mes de novembro do ano pasado, “houbo moitas dificultades para convencer aos produtores, porque a xente é remisa a desprazarse polos prezos dos carburantes e non queren arriscarse a ter un mal día e perder cartos”. Con todo, nesta primeira vez haberá catro postos de cervexa, dous deles de Toén, un de Verín e outro de Vigo.

Ademais do evento, “queremos que a xente coñeza tamén as diferentes variedades de cervexa, que hai moitas como pasa co viño e non son tan coñecidas”. Por outra banda, coma en toda “boa feira” haberá ambientación musical a cargo dunha charanga e cun concerto do grupo Ad Heyra Liti.

Pero aínda que a cervexa sea a protagonista, haberá outros postos de veciños de Toén, entre os que destaca o “polbo, o porco ó espeto, as larpeiradas ou os postos de artesáns”. A idea do grupo tamén é “dinamizar tamén a actividade nun concello do rural, escapando un pouco das tradicionais festas populares”. Gil subliña que esta celebración é “aberta” para todo o mundo e para impulsar estes comezos, “decidimos non cobrarlle nada aos postos por instalarse”. Deste xeito, xa non só servirá para dar a coñecer a cervexa, senón que será un punto de encontro das moitas actividades artesás que se desenvolven en Toén e deste xeito “levar a ledicia por todo o concello da man desta feira”.

Outra das características que diferencian a esta feira da cervexa artesá é o seu emprazamento: este ano celebrarase en Moreiras, pero a idea é que “vaia rotando por todas as parroquias do municipio, e que pase por Toén, Puga, Mugares, etc.”

O alcalde de Toén, Ricardo González, indica que “en canto a asociación chegou con esta idea, dende o Concello animámolos a levala adiante porque sempre temos as portas abertas a estas iniciativas que axudan á dinamización”. Ademais, subliña que “animamos a todos aqueles veciños de Toén que, se teñen algunha idea deportiva, cultural ou de calquera outra índole se apoien no Concello para tratar de desenvolvelas”, ou incluso que, grazas á feira, “a xente se anime a facer cervexa artesá”.

Para esta primeira edición, Antón Gil “polo que eu falei con coñecidos, hai moita expectación de como poida saír, pero estamos moi ilusionados con esta iniciativa e se esta sae ben, estamos moi esperanzados de que a seguinte será mellor”.