A árbore de Nadal máis alta da provincia de Ourense está en Barbadás

Barbadás presume xa de contar coa árbore de Nadal máis alta de toda a provincia de Ourense. O municipio acendeu a iluminación festiva, que inclúe a “todos os recunchos do concello”, segundo destacou o goberno local. Decenas de veciños se reuniron na Valenzá para disfrutar das luces e coñecer o lodoeiro de case 20 metros de altura situado na rúa do Viso. “A Valenzá ten un mimo especial para incentivar o comercio”, destacou Victoria Morenza, tenente de alcalde, na presentación da campaña navideña.

A programación do Concello para estas semanas inclúe propostas para pequenos e maiores de diversa índole, dende deporte ata cultura ou comercio. “O noso Nadal é transversal, cheo de actividades. Non é só o alumeado, senón transmitir ledicia, ilusión, deporte e cultura. Queremos que sexa integrador”, sinalou o rexidor, Xosé Carlos Valcárcel.

Premios

As tendas de Barbadás poden participar ata o 12 de decembro nun concurso de escaparates navideños. “Haberá premios do xurado profesional e do popular”, explicou Marga Pérez, concelleira de Comercio. Os veciños, coas súas votacións a través da páxina web do Concello, serán quenes decidan os gañadores populares.

Por outra banda, o goberno local impulsa por terceiro ano consecutivo o concurso de portais e xanelas con mellores decoracións, que contou cunha “gran acollida” cidadá nas anteriores edicións.

Conciliación

Un ano máis, o Concello promove o Campamento de Nadal. A proposta estará activa no espazo infantil municipal dende o 25 de decembro ata o 5 de xaneiro, para facilitar a conciliación laboral das familias de Barbadás durante a época festiva. Un total de 40 nenos do concello participarán nesta iniciativa, que “encherá de diversión” os días sen clase, segundo aseguraron dende o goberno local.

Programación variada

A programación de Nadal inclúe unha vintena de propostas culturais, con pezas teatrais, monicreques, cinema, concertos ou maxia. Por primeiro ano, o Concello organiza un festival de panxoliñas que conta coa participación de asociacións musicais e culturais de todo o municipio. “O que se pretende é poñer en valor as súas voces e a súa paixón pola música, somos terra de músicos”, recalcou Ana Peleteiro, concelleira de Cultura. Por outra banda, o goberno local promove unha campaña solidaria de recollida de xoguetes que leva por lema “O teu xesto conta”.

En canto ás visitas, por Barbadás pasarán estas semanas Papá Noel, o Apalpador e os Reis Magos. O día 22 de decembro, Papá Noel percorrerá a avenida de Celanova e recibirá aos nenos no poboado de Nadal. O día 29 será o Apalpador o que visite A Valenzá. Xa o 3 de xaneiro, os Reis Magos visitarán A Valenzá e diversos puntos do municipio, e o día 4, percorrerán Diverlandia, no polideportivo