Barbadás solicita mellor cobertura móbil ó Goberno

O alcalde de Barbadás, Xosé Carlos Valcárcel, trasladoulle onte ao subdelegado do Goberno, Eladio Santos, as carencias en financiamento e infraestruturas: “Soportamos unha carga impresionante e inxusta”. Ambos os mandatarios acordaron buscar fórmulas de colaboración para achegar a banda ancha e a telefonía móbil a todos os núcleos, así como para a construír un centro multiusos.

Eladio Santos visitou Barbadás invitado polo alcalde. A reunión, coa meirande parte dos concelleiros do goberno local, xirou en torno á busca de melloras no financiamento para algúns dos servizos que presta o Concello, nomeadamente o Servizo de Axuda no Fogar, pero tamén o financiamento en xeral das entidades locais. “Soportamos unha carta impresionante en atención a persoas dependentes, de idade avanzada ou vulnerables”, explicou Valcárcel.

En “contraposición” ao que fai a Xunta de Galicia, subliñou “a achega de 4.800 millóns de euros por parte do Goberno central a comunidades autónomas e concellos (500.000 euros lle corresponderán a Barbadás), e recalcou que “precisamos financiamento porque cada día estamos asumindo competencias que non lle corresponden ao Concello, o que é sumamente inxusto”.

Outros temas

Por outra banda, na reunión tamén foron abordados outros asuntos como a implantación da banda ancha e a telefonía móbil nas localidades do municipio que aínda teñen carencias hoxe ou do polígono industrial e comercial, que precisa igualmente financiamento para o seu desenvolvemento. Outra cuestión relevante no transcurso da reunión foi o establecemento de fórmulas de colaboración para a construción dunha casa da cultura ou centro multiusos.