O BNG insta á Xunta a reparar a área de partos do CHUO

O BNG reclama á Xunta de Galicia que acelere as reparacións necesarias na área de partos do Complexo Hospitalario Universitario de Ourense para garantir a comodidade das mulleres usuarias. Para a formación nacionalista, o CHUO arrastra un problema histórico de falta de investimento, unha situación que é especialmente “acuciante” en todo o que ten que ver coa saúde da muller, xinecoloxía e maternidade. “Mostra desta situación é que o pasado 30 de decembro desprendíase un falso teito no edificio Materno-Infantil”, explican dende a formación.

Nese momento, a Xunta informou de que se revisarían os falsos teitos e que acometerían as reparacións necesarias. Porén, pasados varios meses, dende o Grupo Parlamentario do BNG afirman que “as usuarias, persoal sanitario e entidades sociais de apoio á maternidade denuncian como esta situación continúa sen ter unha resolución adecuada e que as obras que se ían resolver en menos dun mes levan catro”.

Esta situación, “e a súa estensión no tempo e a non previsión da creación dunha infraestrutura temporal complementaria no hospital, teñen consecuencias sobre a saúde das mulleres e os seus dereitos en materia de maternidade”. Segundo a deputada nacionalista Noa Presas, amosa a desidia do Executivo galego e tamén da xerencia de Ourense.