O BNG de Ourense ve “irregular” a concesión da Pajarera

O BNG advertiu onte da cesión “irregular” a terceiros da explotación da cafetería do Xardín Xaponés por parte do actual adxudicatario, que está en prisión, “incumprindo flagrantemente o contrato de concesión”. Os nacionalistas extraeron a información dos informes técnicos aos que tiveron acceso.

Xa en agosto de 2020, cando o Concello asinou o contrato de concesión para a explotación da cafetería sita na rúa Curros Enríquez, ao carón do xardín Xaponés e cuxa denominación pasou a ser a de “La Pajarera”, o BNG amosaba as súas dúbidas sobre a idoneidade do adxudicatario e as condicións do propio contrato, “adxudicatario que agora está detido e sobre o que pesan acusacións xudiciais moi graves”.

Segundo o voceiro nacionalista, Luís Seara, “neste momento temos unha instalación propiedade do Concello, concesionada e cuxo contrato non se está a cumprir, tal e como se desprende dos informes técnicos aos que tivemos acceso e nos que se especifica unha cesión irrregular a terceiros sen ter a previa autorización municipal, tal e como establece o contrato, o que supón un incumprimento flagrante do mesmo sen que por parte do goberno se activasen os mecanismos sancionadores correspondentes”.

Desde a formación nacionalista lembran que foi precisamente como consecuencia dunha cesión irregular a un terceiro, o motivo polo que o Concello rescatou a concesión no ano 2018, “logo de que Jácome puxera entón o grito no ceo e acusara a todo o mundo de ser cómplice daquela situación. Pois ben, agora atopámonos nunha igual e o alcalde nin di, nin fai absolutamente nada por solucionala, por que?”.

No relativo á falla de Orzamentos, desde o BNG lembran que non soamente o Concello non conta cuns actualizados senón que “sobre os que están en vigor, os de 2020, pesa unha sentenza que anula o capítulo I”, e engade, “esta situación está a xerar múltiples complicacións nun Concello que de non actualizar os orzamentos pode ver perigar a nómina de decembro”. Os nacionalistas amosáronse dispostos a dialogar e negociar co goberno local, pero lembraron que “a iniciativa ten que partir deles, que presenten un borrador, sentamos se nos chaman e falamos aínda que danos a impresión que o PP voltará saír ao rescate de Jácome”.

No relativo á situación creada polo goberno local ao suprimir o programa Comedor sobre Rodas e “deixar sen comer a persoas altamente vulnerábeis ao tempo que a Concelleira delegada ía de vacacións”, a concelleira Rhut Reza avanzou que “pediremos a dimisión” da concelleira, Ana Fernández Nieto.