A cidade de Ourense, a única sen actividades para celebrar o Día das Letras Galegas

O grupo municipal do PSdeG-PSOE na cidade lamentou onte a ausencia dunha programación especial polo Día das Letras Galegas. Unha carencia que achacan á “desidia de Jácome”. O Concello de Ourense é o único das sete cidades galegas que non conta con actividades específicas para celebrar o 17 de maio. “As únicas actividades que se levaron a cabo”, advirte a edil Cristina Cruz, “foron a homenaxe que o alumnado de distintos centros da cidade realizou na Praza Maior e cuxa preparación correu a cargo dos e das estudantes e dos seus mestres e mestras”, así como “o Correlingua, que se coorganiza xunto A Mesa pola Normalización Linguística, a AS-PG, a CIG e a Deputación”.

A “desafección” do executivo municipal pola lingua e cultura galegas “non colle por sorpresa” aos socialistas, segundo din. O PSdeG preguntou pola programación no pleno do abril, pero a resposta foi que “non se ía facer” porque un acto “festivo dese tipo, masivo, coincide coas festas do Couto”. É dicir, non se organizaron actividades para non solapalas coa verbena.

“Debería ter, polo menos, a mesma vontade política para colaborar na organización das festas dos barrios que na organización da festa de todos e todas as galegas”, sentencian dende os socialistas da cidade.